6:00 A.M. – Abak a maranun ning Agosto 27, 2008, Mierkules, king MUMUNANG pamikatagun king kasalesayan ning Parokya nang Sta Monica, Minalin, meganap ing “SALUBUNG” nang STA MONICA at anak nang y SAN AGUSTIN. Misagana la reng mi-indu king arap ning pisamban. Ing baintaung arkitektung y Owen Canlas, yang mig-represent kang San Agustin. Lepitan ne ing larawan nang Sta. Monica, at mipnung lugud leko ne ing BELUNG MATULING A MAKATALUKBUNG king buntuk nang Sta. Monica. Iti ya ing pagmasusian kaniting kafiestan - ing TAGUMPE NING LUGUD AT PANALANGIN nang Sta Monica para king PAMAGBALIK NA LUB at PAMAGPABINYAG ning kayang anak a malwat nang mibiebie king kasalanan.
6:30 A.M. – Midaun ya ing CONCELEBRATED MASS king pisamban nang Sta Monica a inampang da ri Among Greg Vega, Among Ramon Torres, Among Ariel Limjoco at Among Aristotle Maniago. King kayang homilia, telekayan nong Among Greg ding aduang Sacraments of Service – the Sacraments of Matrimony and Holy Orders nung nu akamtan tamu ing KAGANAPAN NING BIE A BUNGA NING KASUYUAN KING PAMILYA AT SANTA IGLESIA. Iti meyakit king bie delanan nang Sta Monica at San Agustin.
8:00 A.M. Kaibat ning banal a misa meganap ing LIBAD NG STA MONICA karing kailugan ning Minalin, kambe da ring sablang patron da ring barrios ning Minalin. Linusung la king ilug ding migit-kumulang atlung dalan a bangka. It was a show of FAITH and UNITY among the people and faithful of Minalin.
Ing FIESTANG ILUG PASALAMAT DE KING DIOS ring tau Minalin karing kalam ning ilug: asan, sugpo, ema, tilapia, bangus, sasa at aliwa pa. King pamanimuna nang Fr. Mark Manabat at ning salukuyan a mayor, ketang banuang 2002, misanmetung la reng tau Minalin PARA BIAYAN LA RENG ILUG. At inyang Agosto 27, 2002, meganap ing MUMUNANG LIBAD NANG STA MONICA AT FIESTANG ILUG. Nung makananung miparangalan ya ing Dios king BINYAG nang San Agustin king DANUM NING SAKRAMENTU NING BINYAG, MIPARANGALAN YA ING DIOS KARENG ILUG NING MINALIN!
11:00 A.M. Mepupus ya ing libad king TETE LOURDES, Minalin. Sinagana la ring libu-libung tau bang makiyagum king MISANG PASALAMAT. King homily nang Among Ariel, sinabi na, migit maulaga ing MASABAL AT LUGUD KAPARANG TAU kesa king pamanalangin at pamagrosaryu. Masabal a meyakit kaniting katatagan. Masabal a meyakit salukuyan ning LIBAD, uling kabang lilintik ing ditak a uran, mumuran namang dakal a bayabas, mineral water, softdrinks in can, sandwiches, sitsaron, mani, nasi, adobo at miyayaliwa pang bakal a pirakayanan at penatsa da ring mekipaglibad
KAIBAT NING KOMUNYON, meganap ing MUMUNANG madramang PAMIPASULAPO KING BELUNG MATULING NANG STA MONICA. Sasabyan ning kantang BALEN A PARI: MEBINIAG TAMU METE KAMBE NA, BAN SUBLING MIE KING PANIBAYUNG BIE, BIE TAMU NGENI, BIE YA PARA KING DIOS, YAN ING KAYAUSAN, YAN ING DIKILAN.
Ing FIESTANG ILUG MINALIN kapigaganakan ya at kapagmasusian king BINYAG NANG SAN AGUSTIN. Kapamilatan ning DANUM NING BINYAG MEGING ANAK NAKATAMU NING DIOS AT MEGING MIKAKAPATAD TAMU KANG KRISTO.
KING PAMIPASULAPO KING BELUNG MATULING, PEPATUKI TA NA NGAN ING DEWAKAN NING KASALANAN A MAGDALANG KASIRAN KING BIE TAMU. MIGBALIK ING BIE DA RING ILUG. MELARIN ING MESIRA NANG BIE SAN AGUSTIN KING BINYAG AT PANALANGIN NANG STA MONICA. MULI TAMUNG BABAKALAN ING GRASYA NING DIOS KARING PUSU AT PAMIBIE-BIE TAMU - BIE MAKAYUGNE KARING PITUNG SAKRAMENTOS, DING PITUNG SIBUL NING BIE.
KAYARI NING MISA MEGANAP ING SALU-SALUNG PAMIKAKAPATAD KING ILUG MINALIN! VIVA STA MONICA! LUID YA ING MINALIN! SALAMAT KING DIOS! AMEN!
