4th Sunday Advent MAB YR B, December 21, 2008

MATIYAGANG PAMAGPURSIGI. Atin kung kaluguran taga Tondo ya, kalwal na king bale da pagrosaryo na neng ima na uling aldo-aldo sangkut ya king basagulu. Lugud ning Apung Ginu angga ngeni mabie ya pa ing friend ku, 58 years old ne. Ing ebanghelyo tamu ngening Dominggu, pauaga ne kekatamu ing upaya ning MATIYAGANG PAMANIGAPU (intercession) at MAKULIT A PAMAKISABING MAYAP (persistence).

King mumunang pamamasa menigapu yang patingapun y Moses para kareng Israelita kabang makipamuk la kareng Amalekita. Kabang makatas ya gamat y Moses sasambut la. Angga na king binuat nong Aaron at Hur ding mingatba nang gamat Moses ban manatili lang makatas anggang lumbug ya ing aldo. Mesambut la reng kalaban. Y Kristo makapaku la ring gamat na king krus. Alang patugut makatas ya gamat manalangin para kekatamu ba tamung sumambut laban king kasalanan. Ing pari tatas no ring gamat na king banal a misa ban mipasiknangan tamu king grasya ning Dios. Neng mangadi tamung Ibpa mi tatas ta la ring gamat tamu ban e tamu manabu king tuksu. Y Santa Monica e sinawang menalangin para king anak ng Agustin, angga na king pepabinyag ya ing anak na at meging yang santu at obispu ning Santa Iglesia. Pengari e ko sasawang manigapu para kareng anak yu ban milisya la king nanumang marok: ban miligtas la king disgrasya, ban milaut la king drugs, ban mayari la king pamagaral da, ban manakit lang mayap a asawa at mika masanting lang bie. Misis panalangin me ing asawa mu ba yang magbayu, at aliwa pa.

Ing ebabanghelyo tamu ngeni tungkul ya king metung a biyuda at metung a ukum. Ing ukum marok ya, mandarambong ya, e tatakut king Dios at ala yang respetu king kalupa ng tao. Ing biyuda e sinawang menigapu at mekisabing mayap king ukum agyang ala yang backer o tegawan. Malwat pibalabalugbug ne mu ning ukum uli sigurung ala yang lagay o ala yang padrino. Ketang panaun a ita mayayakwa la naman pala ding ukum kareng suhol at lagay. Would you believe, at that time, you can buy justice with a plate of steak? Uli ning pamagpursigi at matiyaga nang kakulitan niting biyuda ikwa nang mebisa ning marok a ukum, e king uli ning bisa ne, nune uling mabubusit ne at masosora ne king biyuda. Pota mitas ya pa prisyon at pota tumbukan ne ning biyuda at mika black eye ya pa.

Malino ya ing mensahi ning ebanghelyo: nung ing metung a alang sikanan a biyuda apatangu ne ing alang marineng ukum king keyang kayaduanan, e di lalu nong pakiramdaman ning Dios a malugud at mapamakalulu ding anak nang manigapu Keya? Ding pengari tamu agyang e tano kulitan balu da na ing pamangailangan tamu. Atin kung kaluguran, deng anak na baintau at dalaga na la. Nung minsan makukumbira lang maging tegawan kareng binyag. Uling dinalan ya naman king pangabaintau ing tatang, agyang e da sabyan deng anakne kaya, dinan na nong makapaunang pera para panyaling imalan da, panyaling regalo at pakimkim para king inanak da.

King matiyagang pamagpursigi akamtan tamu ing tagumpe. Ikong miyasawa, magpursigi kayung lulugud king metung at metung busal ning kanawan o kalipatan. Potang kai mipakirut na kayu mu pagmasusian yu na pala ing ka-50 anibersaryu ning kekong kasal. Ikong pengari e ko sasawang magdisiplina kareng anak yu at babie masampat a usuk karela. Potang kai balamu napun pa mu, atin nong sariling pamilya. Ikong magaral e ko paisira lub keng pamagaral yu. Mabilis ing panaun. Potang kai balamu kapilan pa mu, manager na naka pala ning metung a kumpanya o supervisor na naka pala ning metung a food chain. AMEN!